Right? Freedom?

ကျွန်မ Human Right ဆိုတာကိုသေသေချာချာ မလေ့လာရသေးပါဘူး။ လူ့အခွင့်အရေးဆိုတာလောက်ပဲ သိပါတယ်။ ဘယ်အတိုင်းအတာအထိ လူတယောက်ကအခွင့်အရေးရှိသလဲ။ နောက်တခါ လွတ်လပ်ခွင့် Freedom ဆိုတာကရော။ လူတယောက်ရဲ့လွတ်လပ်ခွင့်ဆိုတာကရော ဘယ်အတိုင်းအတာထိပါလဲ။ ကျွန်မနားလည်းထားတဲ့ လူ့အခွင့်အရေးကတော့ သူတပါးရဲ့အခွင့်အရေးကိုအလွဲသုံးစားမလုပ်ပဲ ကိုယ်ရသင့်ရထိုက်တာကို ရအောင်ယူတာပါပဲ။ အဲဒီလိုပဲ လွတ်လပ်ခွင့်ဆိုတာကလည်း သူတပါးကိုမထိခိုက်ပဲနဲ့ ကိုယ့်ရဲ့ဘောင်တခုထဲကနေ အချုပ်အနှောင်မရှိနေထိုင်ခွင့်ရခြင်းပါပဲ။ ဒါပေမယ့် ဘောင်၊ စည်းဆိုတာ ရှိလာပြီ ဆိုမှတော့ ဘယ်လိုလုပ်လွတ်လပ်ပါမလဲလို့ပြောလို့ရပါတယ်။ ဒါပေမယ့် စည်းမဲ့ကမ်းမဲ့၊ အုပ်ချုပ်မှုဘောင်မဲ့ လွတ်လပ်ချင်တယ်ဆိုရင်တော့ လူတွေနဲ့ရောနေလို့ရမှာမဟုတ်ပါဘူး။ တောထဲသွားနေဖို့သာ အကြုံပြုချင်ပါတယ်။ တောမှတောင် မလုပ်ရဆိုတဲ့ စည်းကမ်းဖောက်ဖျက်ရင် အသက်အန္တရာယ်ထိခိုက်နိုင်ပါသေးတယ်။
ကျွန်မဘွဲ့လွန်ဆက်မတက်ခင်အထိကျွန်မသိထားတဲ့ လွတ်လပ်တဲ့လူ့ဘောင်ဆိုတာတော်တော်လေးကို ကျဉ်းမြောင်းနေပါသေးတယ်။ ကျွန်မဇာတိမြို့ကလေးမှာဆိုရင် တယောက်နဲ့တယောက် လေးစားရပါတယ်။ လူကြီးတွေကိုနာခံရပါတယ်။ ပတ်ဝန်းကျင်ကိုဂရုစိုက်ရပါတယ်။ ကိုယ့်အိမ်မှာကိုယ် ဘယ်လိုနေနေဆိုလို့ မရပါဘူး။ အခုအချိန်အထိလည်း ကျွန်မနှစ်သက်၊ မှတ်မိနေသေးတဲ့ အလေ့အထလေးတွေထဲက တချို့ကိုပြောပြချင်ပါတယ်။ အိမ်တအိမ်မှာဆီသတ်တာမျိုး၊ ညှော်နံ့ထွက်မယ့်ဟင်းလျာ တခုခုလုပ်တော့မယ်ဆိုရင် “ညှော်တော့မယ်နော်” လို့ပြောကြပါတယ်။ မတတ်သာလို့လုပ်ရတယ်၊ လေလုံတဲ့အိမ်မျိုးတွေလည်းမဟုတ်တော့ ညှော်နံ့ထွက်လာရင်ကျန်းမာရေးမကောင်းတဲ့သူ၊ အနံ့အသက်မခံနိုင်တဲ့သူရှိရင် ကြိုရှောင်ထားနိုင်အောင်၊ မလှုပ်ရှားနိုင်ရင်လည်း ခြင်ထောင်ထဲမှာနေတာမျိုး ဖြစ်ဖြစ်၊ ကာကွယ်နိုင်အောင် ကြိုတင်သတိပေးတာပါ။ ပြီးတော့ အိမ်တွေမှာကက်ဆက်ဖွင့်ပါတယ်။ ကျွန်မ ၃နှစ်သမီးကတည်းက အဘိုးနဲ့နေခဲ့ရတာပါ။ အဘိုးကအပေါ်ထပ်မှာနေပါတယ်။ ကျွန်မအောက်ထပ်က ကက်ဆက်အကျယ်ကြီးဖွင့်ရင်ဆူပါတယ်။ ဟိုဘက်အိမ်တွေမှာလည်း အဘိုးကြီး၊ အဘွားကြီးတွေရှိပါတယ်။ ရေဒီယိုကခေတ်ဟောင်းတေးတွေဘာတွေလာတဲ့အချိန်ဆို လူကြီးတွေကနားခံသာပေမယ့် ကျွန်မတို့ ငယ်ငယ်ကခေတ်စားစပြုလာနေတဲ့ ရောခ့်ဂီတကို သူတို့မကြိုက်ပါဘူး။ ကျွန်မကိုယ်တိုင်လည်း ဆူဆူညံညံမကြိုက်တဲ့သူမို့ မဖွင့်ပါဘူး။ ဒါပေမယ့် ကျွန်မတို့မျက်စောင်းထိုးအိမ်က ကျွန်မနဲ့မတိမ်းမယိမ်းယောက်ျားလေးက အကျယ်ကြီးဖွင့်ပြီး လိုက်ဆိုတတ်ပါတယ်။ သူတို့တအိမ်လုံးက ရပ်ကျော်ရွာကျော်တွေမို့ အနီးအနားက အဘိုးအဘွားတွေက ကျွန်မကက်ဆက်ဖွင့်ရင် မီးမီးရေ တိုးတိုးလုပ်ဟေ့လို့ ပြောသလိုသူတို့ကိုမပြောပါဘူး။ ဒါပေမယ့် သူတို့ရဲ့အလိုက်ကမ်းဆိုးမသိမှုက ပါတ်ဝန်းကျင်ကိုထိခိုက်စေတာတော့ အမှန်ပါပဲ။ ကျွန်မကက်ဆက်ဖွင့်လို့ ဟေမာနေ၀င်းလို ခပ်အေးအေးသီချင်းလေးတွေဆို ဟိုဘက်အိမ်ကအဘွားရော၊ သူသမီး အန်တီသန်းရောက ကြိုက်ပါတယ်။ အဲဒါဆို မီးမီးရေကျယ်ကျယ်ဖွင့်ဟေ့လို့ ပြောပါတယ်။ ကျွန်မအဘကလည်း မဆူပါဘူး။ ကျွန်မကလည်း အခါကြီးရက်ကြီး ဥပုသ်နေ့မျိုးတွေမှာ မဖွင့်ပါဘူး။ ကိုယ့်အိမ်မှာကိုယ်ပိုင်တဲ့ကက်ဆက် ဘယ်အချိန်ဖွင့်ဖွင့် ဆိုပေမယ့် သူတပါးရဲ့လွတ်လပ်ခွင့်၊ သူတပါးရဲ့ အခွင့်အရေးကိုလည်း လေးစားရမှာပါ။ ကျွန်မကိုးတန်းလောက် ရောက်လာတော့ နားကျပ်နဲ့နားထောင်ရတဲ့ Walkman ကက်ဆက်လေးတွေ ခေတ်စားလာပါပြီ။ ကျွန်မ မွေးနေ့လက်ဆောင်ရတဲ့ အဲဒီကက်ဆက်လေးထဲမှာအခွေတွေဖွင့်ပြီး ဘယ်သူမှမကြားဘဲ နားထောင်ရတဲ့ အရသာကိုကျွန်မအရမ်းကြိုက်ပါတယ်။ အဲဒီအချိန်မှာ အက်ဆစ်တို့ဘာတို့ ရက်ပ် အခွေတွေပေါ်နေပြီ။ ကိုယ်ကကြိုက်ပေမယ့် အဘိုး၊ အဘွားတွေဘယ်လိုမှကြိုက်မှာ မဟုတ်တော့။ ဒီကက်ဆက်လေးနဲ့ဖွင့်တော့ ကိုယ့်ကြောင့်သူများလည်း မထိခိုက်တော့၊ ကိုယ်နားထောင်ချင်တဲ့ ဂီတကို နားထောင်ချင်တဲ့အချိန်မှာ နားထောင်လို့ရတယ်လေ။ အိမ်မှာ ကျွန်မအကိုကလည်း သီချင်းအရမ်းကြိုက်ပါတယ်။ ဒါပေမယ့်သူကတော့ သူ့ဂစ်တာလေးနဲ့ ခပ်တိုးတိုး သူ့ဘာသာသူပဲဆိုလေ့ရှိပါတယ်။ သူများတွေလိုအိမ်ရှေ့ထွက် ဂစ်တာတလုံးနဲ့အော်တာမျိုးလည်းမလုပ်။ အိမ်မှာလည်း ဆူဆူညံညံဟော့ဟော့ရမ်းရမ်းမရှိတဲ့အတွက် ပါတ်ဝန်းကျင်ကချစ်ကြပါတယ်။ အဲဒီလိုနဲ့ ကျွန်မ ဘွဲ့လွန်တက်ဖို့ ထွက်မလာခင်အထိကျွန်မနားလည်ထားတဲ့ လူအခွင့်အရေးကတော့ ကိုယ့်ပါတ်ဝန်းကျင်ကို လေးစားလိုက်နာခြင်းပါ။ အဲဒီလိုကျွန်မနားလည်ထားတဲ့ ကိုယ့်ပါတ်ဝန်းကျင်ဆိုတာ စိတ်သဘောထားတူ၊ ဘာသာတူ၊ ၀ါသနာတူတွေဆိုပြီး ကျဉ်းမြောင်းနေလိမ့်မယ်လို့ ဘယ်တုန်းကမှမစဥ်းစားခဲ့မိပါဘူး။
နောက်ဒီရောက်လာတော့ ကိုယ့်လိုကျောင်းလာတက်တဲ့အကိုတွေနဲ့ စကားပြောဖြစ်ကြရင်းကနေ ခရစ်ယာန်ဘာာသာအကိုတယောက်ကပြောပါတယ်။ လော်စပီကာတပ်ပြီး အော်ကြီးဟစ်ကျယ်အလှုခံတာတို့၊ တညလုံးတောက်လျှောက်ပဌာန်းရွတ်နေတာတို့ သူလုံးဝမကြိုက်တဲ့အကြောင်းပါ။ သူက ဗုဒ္ဓဘာသာ မဟုတ်တဲ့အတွက် ကျွန်မတို့ဘာသာထုံးစံမေတ္တာပို့၊ အန္တရယ်ကင်းပရိတ်ရွတ်တာကို သူနားမလည်နိုင်၊ လက်လည်းမခံနိုင်တာပါ။ ပြီးတော့ အဲဒီလိုအခွင့်အရေးမျိုး တခြားဘာသာတွေကျမရတဲ့အတွက်လည်း မကျေနပ်တာပါ။ ကျွန်မငယ်ငယ်ကတည်းကနေခဲ့တဲ့အိမ်က ဘုန်းကြီးကျောင်းတွေဝိုင်းရံနေတဲ့ အိမ်လို့တောင် ပြောလို့ရပါတယ်။ ပဌာန်းရွတ်ကြတဲ့အချိန်ရောက်ပြီဆို ကိုယ်တွေလူငယ်တွေက အချိန်တန် အိပ်ပျော်သွားပေမယ့် လူကြီးတွေကအိပ်မပျော်ကြ။ အဲဒီတော့ပဌာန်းသံကိုနာခံပြီး တရားနာကြပါတယ်။ ဗုဒ္ဓဘာသာမဟုတ်တဲ့သူတွေအတွက်တော့ ဘယ်လိုနေမလဲဆိုတာ ကိုယ်တိုင် တခါမှမစဉ်းစားမိအောင် ကျွန်မညံ့ဖျင်းခဲ့ပါတယ်။ အဲဒီအကိုနဲ့စကားပြောမှပဲ ဘာသာပေါင်းစုံရှိနေတဲ့ကျွန်မတို့နိုင်ငံမှာ ဘက်ညီအောင် ဘယ်လိုလုပ်ပေးရမလဲ။ ဘာသာတိုင်းရဲ့အခွင့်အရေး၊ လွတ်လပ်ခွင့်ကိုမပိတ်ပင်ပဲ ဘာသာခြားတွေအတွက်လည်း အနှောင့်အယှက်မဖြစ်ဘဲဘယ်လိုပေါ်လစီမျိုးထုတ်ပြီး ဒီပြဿနာကို ဖြေရှင်းရမလဲဆိုတာကို ကျွန်မစဉ်းစားစပြုလာပါတယ်။ တချိန်တည်းမှာပဲ စဉ်းစားမိတဲ့ ပြဿနာတွေက ဘာသာလေးခုစလုံး လွတ်လပ်စွာဟောပြောခွင့်ပေးလိုက်တဲ့အခါ ဟိုဘက်ကတမျိုး၊ ဒီဘက်ကတမျိုး။ ဟိုဘက်ကလော်စပီကာနဲ့တမျိုးအော်၊ ဒီဘက်ကလော်စပီကာနဲ့တမျိုးအော်ဆိုတာမျိုးတွေဖြစ်လာမလား။ (ဥပမာ အခုအင်တာနက်ပေါ်မှာ၊ ဘလော့တွေပေါ်မှာ အော်နေကြသလိုမျိုး။) ဘာသာလေးခုအပြင်အခုပေါ်ပေါက်နေတဲ့ ဂိုဏ်းခွဲတွေပေါ်လာပြီး မူရင်းဘာသာတွေကိုခြိမ်းခြောက်လာမလား။ ကျွန်မတို့ရဲ့မူရင်းရည်ရွယ်ချက်ဖြစ်တဲ့ မည်သည့်ဘာသာမဆို အေးချမ်းလွတ်လပ်စွာ ကိုးကွယ်ခွင့်၊ လေ့လာနိုင်ခွင့်ဆိုတဲ့ လမ်းကြောင်းကနေ သွေဖယ်သွားမလား။ ကျွန်မကိုယ်တိုင်မေးဖြစ်လာတဲ့ အဲဒီမေးခွန်းတွေကို မဖြေနိုင်သေးပါဘူး။ အဲဒီတော့ ဒီဘာသာရေးလွတ်လပ်ခွင့်ပဲဖြစ်ဖြစ်၊ လွတ်လပ်တဲ့ လူ့ဘောင်အခွင့်အရေးဆိုတာပဲဖြစ်ဖြစ်ကျွန်မတို့ ပိုပြီးသတ်သတ်မှတ်မှတ် အဓိပါယ်သတ်မှတ်ဖို့ လိုလိမ့်ဦး မယ်ထင်ပါတယ်။